Azərbaycan Respublikasının Prezidenti İlham Əliyev və birinci xanım Mehriban Əliyeva  Xankəndi şəhərində Zəfər parkının açılışında iştirak ediblər. Ümumi sahəsi 9 hektar olan Zəfər parkının təməli bu ilin fevralında Prezident tərəfindən qoyulub. Parkın girişindən Zəfər tağına doğru 44 pilləkən və mərkəzi hissəsində quraşdırılmış lövhələr üzərində müharibənin gedişi barədə məlumatlar, o cümlədən azad olunmuş yaşayış məntəqələrinin adları yazılıb. 2023-cü ildə keçirilmiş antiterror əməliyyatının nəticələrini əks etdirən məlumatlar da lövhələrdə qeyd olunub. Zəfər tağının hündürlüyü Vətən müharibəsi günlərinin sayına görə rəmzi olaraq 44 metr təşkil edir. Bina 10 mərtəbədən və Zəfər Günü ilə bağlı 8 rəqəmini simvolizə edən konstruksiya inşa olunan terrasdan ibarətdir. Doqquzuncu mərtəbədə “Zəfər qalereyası” sərgi-nümayiş zalı yaradılıb. Parkın ərazisində fəvvarələr yaradılıb, işıqlandırma və musiqilərin səsləndirilməsi üçün sistemlər quraşdırılıb.