Azərbaycan Prezidenti İlham Əliyev oktyabrın 16-da BMT-nin Məskunlaşma Proqramının (UN-Habitat) icraçı direktoru Anaklaudia Rossbaxı qəbul edib. Görüşdə Xankəndidə keçirilən III Azərbaycan Milli Şəhərsalma Forumunun əhəmiyyəti vurğulanıb. Anaklaudia Rossbax forumun yüksək səviyyədə təşkil olunduğunu, şəhərsalma sahəsində aktual müzakirələrin aparıldığını bildirib. Qonaq Azərbaycanın Qarabağ və Şərqi Zəngəzur iqtisadi rayonlarında aparılan bərpa-yenidənqurma işləri, müasir şəhərsalma modelinin tətbiqi və BMT-ə verdiyi maliyyə töhfələrini yüksək qiymətləndirib. Söhbət zamanı həmçinin 2026-cı ildə Bakıda keçiriləcək Ümumdünya Şəhərsalma Forumunun 13-cü sessiyasına hazırlıq və Azərbaycan-UN-Habitat əməkdaşlığının perspektivləri müzakirə olunub.