Qarabağın bərpası üzrə II Dövlət Proqramının hazırlanması istiqamətində artıq işçi qruplar fəaliyyətə başlayıb. Bu ilin sonuna qədər I Dövlət Proqramı çərçivəsində qarşıya qoyulan vəzifələrin uğurla icrası nəzərdə tutulur. 2027-ci ildən etibarən növbəti mərhələni əhatə edən yeni proqramın tətbiqinə başlanacaq. Bu barədə 5-ci Azərbaycan Beynəlxalq “Qarabağın Bərpa, Yenidənqurma və İnkişafı” - “Rebuild Karabakh” sərgisində Dövlət Şəhərsalma və Arxitektura Komitəsinin sədr müavini İlqar İsbatov bildirib. O, deyib ki, Xankəndi, Ağdərə, Xocavənd və Xocalı şəhərlərinin baş planlarının hazırlanması yekunlaşıb və razılaşdırılma mərhələsindədir. İşğaldan azad olunmuş ərazilərdə planlama işləri sıfırdan aparılıb. Bütün işğaldan azad olunmuş ərazilərin ümumi planı hazırlanıb, 8 şəhərin baş planı təsdiqlənib.