• KƏPƏZ TV
    canlı yayım
Bu günə xəbərlərin oxunma sayı: 688
— 08.06.2022 21:12

Uzunoba kompleksi Naxçıvanda futbolun inkişafına təkan verəcək

KepezTV Player

Azərbaycanın ayrılmaz hissəsi olan Naxçıvan Muxtar Respublikasında son illər idman sahəsində böyük layihələr həyata keçirilir. Xüsusilə də futbolun inkişafı qarşıya qoyulan prioritet məsələlərdəndir. Bu yöndə həyata keçirilən işlər çərçivəsində 1 il öncə Uzunoba Təlim-Məşq İdman Kompleksi inşa olunub ki, sözügedən idman qurğusu uşaq futbolunun inkişafına töhfə verəcək.

Uzunoba Təlim-Məşq İdman Kompleksi “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı” çərçivəsində tikilib. Kompleks Naxçıvan şəhərinə yaxın ərazidə Babək rayon Uzunoba kəndində inşa edilib. Təlim-Məşq bazasında uşaq futbolu üçün lazımi infrastruktur yaradılıb.

Naxçıvan Muxtar Respublikasının idman sahəsində, xüsusilə futbolda maddi-texniki bazanın yaxşılaşdırılması istiqamətində bir sıra işlər görülür. Uzunoba Təlim-Məşq İdman Kompleksi də bu sıradadır. Burada açıq meydançalarla yanaşı, qapalı meydança, həmçinin çimərlik futbolu üçün də meydança nəzərdə tutulub ki, bu da idmançıların ilin müxtəlif fəsillərdə hazırlaşmalarına, təlim-məşq toplanışları keçmələrinə imkan yaradır.

Təlim-məşq idman kompleksi ümumi olaraq 10 min 300 kvadratmetr sahəni əhatə edir. Qurğunun ərazisinə inzibati bina, süni örtüklü böyük futbol stadionu, üstüörtülü mini-futbol meydançaları, ikitribunalı çimərlik futbolu stadionu daxildir. Böyük futbol stadionunda tamaşaçılar üçün tribuna qurulub. Ümumiyyətlə Uzunoba muxtar respublikada yaradılan ilk təlim-məşq kompleksidir.

Uzunoba Təlim-Məşq İdman Kompleksi əsasən uşaq futbolu üçün nəzərdə tutulsa da, gələn mövsümdən 1-ci divizionda çıxış edəcək “Araz-Naxçıvan” klubu da müəyyən vaxtlarda hazırlıqlarını burada keçə biləcək.

Uzunoba Təlim-Məşq İdman Kompleksindəki stadionlar FİFA VƏ UEFA standartlarına tam cavab verir və beynəlxalq yarışların keçirilməsi üçün uyğundur. Baza bu il 55 yaşını qeyd edən və qarşısına böyük hədəflər qoyan “Araz-Naxçıvan” klubu üçün ehtiyat qüvvə hazırlamaq baxımından mühüm rol oynayacaq.