Ailəm, yoxsa karyeram?

Ən xoş günlərimizdə bir-birimizə ailə xoşbəxtliyi, ailə səadəti arzulayırıq. Çünki ailə müqəddəsdir, ailə, övlad sahibi olmaq isə yaşanan ən ülvi hissdir.

Karyera, iş. – Yaşamaq üçün lazımlı olan maddiyyatı əldə etmək üçün insan çalışır, işləyir vəsait əldə edir. Işləyə-işləyə karyera qurulur. Belə ki, ilk olaraq ali təhsil alarkən elə karyera qurmağı fikirləşirsən. Özünəuyğun iş tapırsan, yenə də fikrində karyera qurmaq olur, bacardığın qədər çalışırsan, hətta evdə olanda da, yatanda belə başqa yollar axtararaq işində irəli getmək istəyirsən və beləliklə də müəyyən zaman keçəndən sonra iş sahəsində bir xeyli irəli getdiyinin şahidi olursan, bu insana ruh verir. Amma yaşa dolduqca məsələn, universiteti bitirirsən və sənə lazım olan daha çox şeyi əldə etmək üçün əlavə pul lazımın olur, yaxud ailə qurursan, onun ehtiyaclarını ödəmək üçün yenə həmin hal, daha çox gəlir əldə etməyi düşünürsən, demək olar ki, artıq karyera düşünmürsən, artıq maddiyyatla daha çox maraqlanmağa başlayırsan.

Əksər vaxtlarda şahidi oluram müxtəlif televiziya verilişlərində, demək olar ki, əksər internet forumlarda: “Ailə, yoxsa karyera?” bu sual ətrafında müzakirələr gedir, demək olar hər zaman da aktual mövzular sırasındadır, hərə bir cür qəbul edir, xüsusən də xanımın çalışmasını qəbul edənlər də olur, etməyənlər də, düzü etməyənləri başa düşmürəm.

Bu sual ətrafında çox düşünmüşəm, amma sonra qərara gəldim ki, bu sual ətrafında düşünməyə dəyməz. Yuxarıda da qeyd etdiyim kimi ailə ehtiyaclarının öhdəsindən gəlmək üçün müəyyən məbləğdə maddiyyat lazımdır, bunu necə əldə etmək olar? Təbii ki, çalışıb işləmək yolu ilə. Fərqi yoxdur hansı sahədə (Kamil bir palançı olsa da insan, yaxşıdır yarımçıq papaqçılıqdan-N.G ) əsas odur ki, işləyirsən və beləcə yığılan əmək təcrübəsi karyeranı yaradır. Necə ola bilər ki, insanı bu iki məfhum arasında seçimə məcbur etsinlər. Gələcəkdə başına hansı hadisələrin gəlməsindən bixəbər ola-ola işindən azad ola bilərsən, sonradan bunun peşmançılığını da çəkə bilərsən. Allah heç kəsi atdığı addımda peşman etməsin. Demək olar ki, bu sual əksər vaxtlarda qadınlara yönəlir. Bir qadını bu cür seçim qarşısında qoymaq nə dərəcədə doğru fikirdir? Desəm ki, bu köhnəlik tərəfdarlarının fikirləridir, dar düşüncədən irəli gəlir, düz çıxmaz, bu cür fikirlərə ali təhsilli, savadlı, yüksək ixtisaslı, intellektli insanların arasında da rast gəlinir.